تحدي ال٢٩ يوم - الانطلاقة

 مرحبا ايها العالم!

اني مرتضى اشتغل مهندس برمجيات وصارلي سنين احلم انه اركض ماراثون (٤٢كم). هذا الشي يعنيلي هواية لانه اني اغلب حياتي احس نفسي ما احب او اعرف الركض، لذلك اذا گدرت اركض ماراثون كامل راح يكون انجاز عظيم بالنسبة الي. بالاضافة الى انه راح يزيد لياقتي واني اصلا صارلي فترة طويلة منقطع عن الرياضة.

لحد الان ركضت ٣ مرات نص ماراثون (٢١كم) بس هذي كلها قبل ٧-١٠ سنوات. هذي بعض الصور من السباقات الي شاركت بيها بالماضي:

وهسة قررت اسوي تحدي لمدة ٢٩ يوم حتى اقوي نفسي بالركض. اكو مصادر هواية عن جداول الركض وشكد المسافة الي لازم يركضها الشخص كل يوم. راح اتبع هذا الجدول (لكيته من خلال البحث على گوگل بعد ما كتبت "Marathon Training Plan").

هدفي انه بنهاية هذي الفترة اگدر اركض ١٠كم باقل من ٦٠ دقيقة.

راح استخدم تطبيق الركض MapMyRun حتى اسجل بيانات من كل مرة اركض بيها. وكذلك راح اتفرج فيديوات على اليوتيوب من عدائين محترفين اتعلم شنو بعض الاشياء الي ممكن تحسن ادائي بالركض

 اثناء الركض راح احاول اسمع فد كتب صوتية متنوعة وراح اشارك الاشياء الي تعلمتها اثناء الركض بهذي المدونة.

كلش متحمس هذا الشي والشغلة الوحيدة الي خايف منها انه اتعاجز واستسلم بالطريق. بس راح احاول باقصي قوتي

ترقوبنا!!